Santiago, 17 de novembro de 2009.- A presidenta do Parlamento de Galicia, Pilar Rojo, congratúlase pola liberación dos tripulantes do pesqueiro Alakrana, logo de mes e medio secuestrados en augas do océano Índico, felicitación que dirixe especialmente aos liberados e ás súas familias.

 

“Logo de tanta e tanta tensión, resulta especialmente reconfortante que os tripulantes poidan volver coas súas familias sans e salvos”, agrega Rojo Noguera.

 

Apunta a máxima responsable da Cámara galega que, superada a conmoción provocada polo longo secuestro, “chega o momento de reflexionar e planificar en frío” para tratar de evitar que volvan repetirse sucesos semellantes ao do Alakrana, que mantivo precupada, durante semanas,  o conxunto da sociedade española.

 

Pilar Rojo valora tamén a corrente de solidariedade que arroupou aos secuestrados e ás súas familias durante este tempo, como aconteceu coas diferentes declaracións institucionais promovidas polo Parlamento de Galicia.

Saúdos, Gabinete de Comunicación do Parlamento de Galicia