O Parlamento acolle unha mostra conmemorativa do 50 aniversario da Asociación de Pais de Persoas con Discapacidade Intelectual (ASPAS)

 
• Santalices enmarca esta actividade na vocación de apertura do Parlamento ”a toda a sociedade”
 
• A Oferta de Emprego Público do Parlamento para este ano reserva unha praza a persoas con discapacidade intelectual
 
Santiago, 23 de outubro de 2017.- A Asociación de Pais de Persoas con Discapacidade Intelectual (ASPAS), fundada en Santiago en 1967, celebra este ano o seu medio século de vida que recordan nunha exposición que hoxe abriu as súas portas no Parlamento de Galicia, onde poderá visitarse durante estes días.
 
A mostra foi inaugurada este mediodía nun acto presidido polo titular da Cámara, Miguel Ángel Santalices Vieira, e no que tamén interveu o presidente  da ASPAS, Marcelo de la Cruz Luzón. Participaron no acto deputadas e deputados dos catro grupos parlamentarios así como o vicepresidente e a secretaria da Mesa da Cámara.
 
Parlamento aberto
 
Santalices Vieira recoñeceu que non é frecuente que o Parlamento acolla actividades que non gardan relación directa coa función lexislativa, pero apuntou que a Cámara debe esforzarse por abrirse “a toda a sociedade” e subliñou que “é unha honra” albergar esta iniciativa no Pazo do Hórreo.
 
O presidente da Cámara animou tamén aos asistentes ao acto inaugural  a coñecer e utilizar as diferentes vías de participación cidadá habilitadas polo Parlamento, entre as que se referiu expresamente ás proposicións non de lei e as preguntas ao Goberno de iniciativa cidadá.
 
A inclusión como obxectivo
 
Miguel Ángel Santalices Vieira recordou que a Oferta de Emprego Público do Parlamento de Galicia para 2017 inclúe unha praza de uxier reservada a persoas con dispacacidade intelectual. Trátase, ao seu xuízo, de un paso pequeno co que se pretende contribuír a impulsar a inclusión das persoas con discapacidade intelectual.
 
O presidente da Cámara  puxo en valor o traballo desenvolvido por ASPAS desde a súa fundación e agradeceu a implicación de todas as persoas que participan e colaboran con esta entidade.
 
Saúdos, Gabinete de Comunicación do Parlamento de Galicia.

Imaxes relacionadas